Hikayat Ranto 2

Karangan keu ureueng lakoe

Bungka di nanggroe tuha muda

Tinggai naggroe deungon ma wang

Jak lam uteuen dum cut raya

Tuhan peujeut naggroe ranto

Sinankeu laloe manusia

Aceh Pibie Tunong Baroh

Le that gadoh dalam rimba

Peuebu seubab nyang jeuet meunan

Dengo teelan lon calitra

Seubab jipateh iblih syetan

Siribee ban jipeudaya

Jigusuek di ulee jisa'h di geulunyueng 

Teuma jitamong u lam dada

Limong peukara jiyue dilee

Deungo sampe lon calitra

Phon-phon jiyue meuadoe angkat

Keudua mumadat he syeedara

Keu lhee jiyue tameujudi

Teuma pancuri akhe masa

Keupeuet tameusabong

That meuuntong jalan gata

Limong jiyue tameureubot

Ngon nyan trok limong peukara

Tadeungo nyoe wahe adoe

Seksa dudoe lam nuraka

Tueduek 'oh noe saboh pangkat

Jinoe lon sambat laen haba

Naggroe ranto na tatuban

Keusukaran dum peukara

Watee saket aloh-alah

Apoh-apah han teukira

Tabalek wie tabalek uneun

Sapeupi tan na tarasa

Lon boh jinoe saboh syae

Nak tatukri he syeedara

Boh pisang mah masak di lubang

Makanan cicem si baroe-baroe

Meutuah tuboh meuteumee riwang

Jikalee malang mate di ranto

Beuneung raja di dalam paya

Limpah cahya langet bumoe

Keuh han teungeut kubleut han jaga

Pajan masa kuteumee woe

Adak na sayeup kuteureubang

Nyum beu rijang troh u nanggroe

Tinggani sidroe baranggajan

Rakanpi tan jitem peutoe

Apuipi tan rujeepi han

Kutika nyan dawok tamoe

Adak na pade dalam kupok

Hana soe tumbok pakri jinoe

Takeumeung yue gop hana sidroe

Toh pakri proe tapeulagee

Yoh nyan teuingat nyan keu ma wang

Teuingat yoh nyan keu estri droe

Adak han kujak masa dilee

Na soe peulagee jan mumeunoe

Amma bakdu bacut lon seubot

Bek that lupot ureueng binoe

Na tadeungo putro meutuah

Hankeu leupah bungka judo droe

Allah Allah nyak sambinoe

Keu lakoe bek paleng muka

Adak na taeu dalam uteuen

Tasumpom teupeuen taro ie mata

Adak proe teungoh tapuminyoe

Taeh tamoe dalam tika

Nyan dum saket deungon mangat

Nanggroe Barat he syeedara

Lon peurasa sit ka dilee

Sipu malee lon peuhaba

Adak tan tajak nyan u Barat

Dalam surat taeu nyata

Beu that taweueh keu ureueng lakoe

He ureueng binoe tuha muda

Aduen adoe rakan sahbat

Beu taingat cut ngon raya

Keu ureueng lakoe beu that tahiro

Ingat he po siumu donya

Beu tapike maseng keudroe

Leupah lakoe dalam rimba

Uroe malam hana teungeut

Lam teuingat po keu gata

Lah bak pihak tan peue puwoe

Ate teugoe-goe nyan keu gata

Masa tajak jok saboh keureubuh

Ngon peunajoh linto bungka

Untong-untong ngon tajak intat

Bungka u Barat di gampong tha

Laen nibak nyanpi taingat

Ranup lipat ban sikada

Padum teelan ngon bu kulah

Masa meulangkah u kuala

Tajak po lem beu seulamat

Beu taingat po ma ka tuha

Mata ka supot geulunyueng ka tuloe

Beu rijang tawoe tajak tanom ma

Untong di nanggroe sapeue pakat

'Oh troh u Barat laen kira

Meunan jikhuen yoh di nanggroe

'Oh troh u ranto pungo gila

Meukeudepi tan lampohpi han

Pat na geulanggang jijak mita

Meunan-meunan gadoh nanggroe

Pike adoe tuha muda

Jitinggai aneuk deungon nang mbah

masa jikeubah han jikira

Ladom galak bak meukeude

Ladom po leube puga lada

Bitpi galak bak meukeude

Le nyang leube pajoh riba

Meukat apiun ngon galaran

Laba teelan barangjan na

Gala lam jaroe laba jilakee

Nyankeu sampee jeuet keu riba

Apiun jiplah ngon timbangan

Nyanpi tuan deesya raya

Nyan meukeude le nyang hareuem

Sisat bandum sagoe donya

Meukat apiun ngon galaran

Keulhee teelan reuyeue meulaba

Meunan nyang la nanggroe ranto

Meuseuki hai po malemjih na

'Oh troh u ranto tan seumbahyang

Tuwo keu Tuhan dumteu rata

Masa di nanggroe jiseumbahyang

Jinoe jibuang han jikira

Hana hiro keu 'ibadat

Bandum sisat leube nyang na

Nyang that leubeh tahareukat

Wahe sahbat lampoh lada

Adak na reuyeue bek tasambat

Beu tatakot nyan keu deesya

Laen nibak nyan po tameugoe

Siwa adoe tanoh paya

Lompi soe bloe lada lam bak

Hareuem meuteulak teungku raja

Adak tabloe teungoh meubungong

Han peue tanyong nyanpi riba

Di lon teungku kupeuingat

Lonpi sisar leubeh bak gata

Dumna nanggroe le nyan meunan

Bukon teelan lon peurbula

Malem-malem nyang meukeude

Geulanggang rame jibri beulanja

Jibri pangkai keu ureueng meutajoe

Bukon adoe pungo gila

Meuseuki malem jeuet beuet Arab

Rugoe kitab seumbahyang hana

Jareueng-jareueng na seumbahyang

Bulueng limong he syeedara

Tabri manok keu ureueng meutajo

Bukon rugoe amai gata

Tajok peudeueng keu ureueng meureubot

Wajeb meuhad deesya gata

Taplah apiun ngon timbangan

Nyanpi teelan sama juga

Samah di gop di gata sikatoe

Bukon rugoe sia-sia

Meuh ngon pirak ureueng binoe

Lam donyan nyoe le soe hawa

Tuntut donya ureueng sisat

Bek he sahbat galak gata

Firman TUhan hana khali

Hadih Nabi hana reuda

Ad-dunya jifatun wa talibuha kilabun

Makna mufom ubak gata

Jinoe makna teungku tafam

Di lon bingong ate buta

Kareuna seubab eleumee kureueng

Lon ngon budueng akai hana

Donya that khieng nibak bangke

Ureueng nyang tuntut anjeng nama

Maken tatuntut maken meureulop

Maken taturot maken jiba

Padum-padum ureueng tuntut

Ban meukeusudjih han ek na

Patah gaki puntong jaroe

Han jitem troe napsu hawa

Meunan nyang le iblih tipee

Hana jithee tuha muda

Miseue sidom eu meulisan

Nyum jipeureulan ngon peudeuna

Pruetpi han troe jihpi mate

Meutindeh bangke bansineuna

Saboh napsu ban bubayang

Miseue tadong teungoh duha

Maken tapeucrok maken jiplueng

Miseue ie krueng u kuala

Meuhan got niet bak hareukat

Ingat sahbat seksa gata

Meuseuki teelan bak meununtut

Meubek po cut deungon ria

Aduen adoe rakan sahbat

Beu taingat dum syeedara

Tahareukat bak meusampe

Bekkeu tabri cuma leuta

Adak mate bunda ngon ayah

Tabri seudeukah jeut keu fahla

Meuhan meunan wahe adoe

Khanduri rugoe sia-sia

Teungoh takalon na khanduri

Tasangka sah le keu ayahda

Gatapi mate hareukat payah

Page balah dudoe nuraka

Meuhan got niet bak hareukat

Ingat sahbat dudoe teuka

Malek mawot jak tueng nyawong

Nyan phon keunong teuka cuba

Hingga datang 'an kiamat

Cit lam adeueb he syeedara

Di Aceh kon troh u ranto

Meunan he po tan meutuka

Meunan teelan bandum nanggroe

Troh 'an jinoe riyeue meulaba

Meuna areuta got pakaian

Wareh rakan that mulia

Meutan  areuta lagi gasien

Keuhinaan bak syeedara

Adak esteuri teungoh baleh

Maken leubeh hina keu gata

Bak tuan than han peue peugah

Breueh nyang mirah nyan jimita

Boh seulimeng ngon eungkot brok

Nyankeu jijok po keu gata

Campli cina umpeuen beurujeuk

Nyan jipeuduek u nap gata

Teuduek haba nyan 'oh nan dilee

Jinoe sampee laen calitra

Amma bakdu dudoe nibak nyan 

Muwoe karangan bak ayah bunda