Bismillahirrahmanirrahim
Nyoe keu isem lon boh di sinoe
Subhanallah walhamdulillah
Tuhan nyang sah qadim sidroe
Maha suci deungon puji
Tuhanku Rabbi wajeb sidroe
Suci ngon puji sabet bak Tuhan
Laen nibak nyan geuceula dumsoe
Tuhan geutanyoe amat tinggi
Len 'abdi hamba barangsoe
Baranggari bandum makhluk
Nyang sabe duek lam donya nyoe
Kaya gasien hamba Tuhan
Seukalian alam dum barangsoe
Meuseuki ulat nyang lam batee
Bahle meusilee leumah cit droe
Meuhad raseuki dum bak Allah
Deungo lon peugah wahe adoe
Seupeurti ban firman Tuhan
Dalam Quran takalon keudroe
Wama min dabbatin fi l-ardi
illa 'ala l-lahi rizquha
Makna mufom dum bak sahbat
Sit bingong that ulon sidroe
Seubab rindu dengon deundam
Nyoe lon karang peuteutap ate droe
Di gop geukarang deungon awe
Ladom geurante deungon taloe
Di lon lon karang dalam ate
Lon rawe-rawe lam dada droe
Lon cok daweuet deungon keureutah
Teuma lon kisah keu pie droe
Supaya jeuet keu 'ibarat
Jeuet seulamat dua nanggroe
Geutanyoe taudep dalam donya
Dua peukara han tom sunyoe
Saboh bagoe tuntut eleumee
Mita guree nyang peuhareutoe
Dua bagoe mita hareukat
Tapileh pat laba rugoe
Mubek teungku jalan salah
Banci Allah keu geutanyoe
Lon peuingat dum syeedara
Tuha muda aduen adoe
Leumah akai ubak ate
Jitamong le lam dada droe
Tadeungo nyoe lon peuhaba
Agam dara aduen adoe
Bekkeu dawok tameututo
Ingat hai po dum geutanyoe
Meuseuki uroe meuseuki malam
Ingat keu untong akhe dodoe
Aduen adoe tuha muda
Agam dara dum sinaroe
Dara agam kaya gasien
Seumbahyang teelan dum bek sunyoe
'Oh troh umuteu siploh thon
Wajeb taseuon nyang limong peue
Shahadat seumbahyang puasa jakeuet
Haji teuma jeut geunap limong peue
Jikalee han ek tajak u Makkah
Taseumah nang mbah geunap uroe
Tameuseulaweut tabri seudeukah
Nyampi roe sah ampon deesya droe
Apui nuraka jimeusumpah
Deumi Allah han jipeutoe
Suloh nyang akhe beu tabeudoh
Di awai suboh lam jaga droe
Pinto langet tujoh lapeh
Yoh nyan abeh tuebuka keudroe
Tameulakee ubak Tuhan
Neutulak han baranggapeue
Di lon teelan kupeuingat
Lon nyoe sisam malam uroe
Tameulakee bak sunggoh ate
Ie mata ile sajan meutaloe
Taleueng jaroe tangah u langet
'Arasy taniet rab geutanyoe
Kareuna 'arasy rahmat sinan
Firman TUhan tadeungoe jinoe
Yadu l-lahi fiqwa aidihim
Ingat dalem makna jinoe
Poteu peutroh peu nyang hajat
Nyang meukeusud wahe adoe
Seupeurti ban firman Allah
Bek taubah harap geutanyoe
Ud'uni astajib lakum
Tuhan neukheun keu geutanyoe
Meujimohon hamba kee
Peue jilakee kubri jinoe
Firman Tuhan hana khali
Hadih Nabi sajan meutaloe
Man talaba syaian jadda wajada
Maknajih teuma tapeuhareutoe
Meuna jituntut sunggoh ate
Meuhad geubri bek syok geutanyoe
Haba lon nyoe sang ajimat
Le that mufeu'at soe tem pakoe
Amma bakdu dudoe nibak nyan
Nyoe karangan phon lon mula...
(bersambung)
Tidak ada komentar:
Posting Komentar
sopan lebih baik bukan berarti ga sopan mungkin tidak baik tapi yang pasti buruknya... (bingung kan??) :P